王菲個唱被指走音 學友：做騷係同自己比較
【做完巡迴已經57歲】王菲個唱被指走音 學友：做騷係同自己比較蘋果日報 時間 (HKT): 0103 01:43
張學友噚晚喺紅館結束咗23場嘅香港站世界巡迴演唱會，學友話太太嚟咗睇兩場，囡囡就睇咗三場，佢又話每次返嚟香港做都好緊張，o依家鬆咗一口氣，之前喺大陸做咗18場，所以冇咁易出錯。不過原來學友身體狀況喺咁多場入面，都唔係話太好，o依家喉嚨有少少發炎，要食消炎藥。
喺演唱會中途，學友揀咗一張一家三口嘅合照，整咗幅畫送畀佢哋，學友仲話：「我同個囡囡講要多啲時間陪父母，唔好激佢哋，仲同爸爸媽媽講小朋友大得好快。」記者就問學友嘅囡囡係唔係成日激佢，學友就話：「佢哋好錫我，錫到我不得了。」
完咗演唱會，學友都冇得休息，因為要去大陸做巡迴，不過暫時未知有幾多場，問到會唔會再返香港，學友話因為今次冇錄影，如果要錄影番就要返嚟香港。
講到今次演唱會完咗之後，係唔係唔會再開，學友又指未必，不過開四面台就比較吃力，佢表示：「所以今次同自己講要做得最好，因為人係會衰退，體力會減，兩年後完咗巡迴都57歲，再等多5年再開都已經年過60，到時大家見到我跳都唔想我咁辛苦。」
今次演唱會好多演藝圈嘅朋友都有入場睇，讚學友嘅演唱會好好睇，仲話學友將演唱會呢條底線拉得太高，學友就話：「其實做騷係同自己比較，而唔係互相比較。」網上有人將王菲同學友比較，指王菲走音，學友就話：「咁比較唔係太公平，佢唱得一場，得就得，冇得操，我有咁多場就可以調整嘅。」
（採訪、攝影：馬建華、仇志德）
頁:
[1]