香港再開騷！56歲張學友世巡誓破紀錄
香港再開騷！56歲張學友世巡誓破紀錄09月25日(一) 00:02 ONTV 東網電視✕
歌神張學友的《A Class Tour學友經典世界巡迴演唱會》由去年底在北京揭幕，已經走遍了內地超過40多個城巿，還有香港、澳門、台北及新加坡等。而學友就由成都抵香港機場，有十數個「忠粉」專程去接機。剛在成都連唱兩場的學友，在9個月內以驚人的體力完成了103場巡唱，而他對上一次2010至2012年舉行的世界巡唱，在18個月內做了146場演唱會，即使新一代「歌神」陳奕迅對上一次歷時三年多、走遍大半個地球合共舉行了135場巡唱，也望塵無及！相隔5年，學友將會再破自己保持的場數紀錄，果然是歌神中之歌神！
做騷易過食生菜
笠住帽戴上口罩的學友，在粉絲包圍下步向停車場，健步如飛的學友被問到攰嗎？他笑說：「OK喎！（做咗103場騷？）係呀，做得幾開心，好似有啲進步！（邊方面？）我覺得喺做騷、唱歌各方面，都好正！（9個月內做咗百場騷，真係好快？）快呀，快過上次！（會唔會破到你上次18個月唱146場紀錄？）應該會破。」學友今年56歲，體力依然弗到爆，他笑說：「其實都估唔到，開頭我都驚驚哋，但好似冇乜嘢咁（指做騷），幾開心！（你撈晒，人哋唔使撈！）唔關事，各做各啫，唔關場數問題。」
會開Part 2
學友之前在紅館的23場騷，門票秒殺，一票難求，問到他會否再在港開Part 2？他坦言：「會呀，返嚟錄（影），因為上次我未錄（影），不過未知幾時，未訂場。」下一站學友將到貴州，緊接是到家鄉天津開唱。據知學友目前的巡唱暫時排到明年3月，除了內地多個城巿，還有星馬、泰國、美加、歐洲，因為有些地方反應熱烈，徇眾要求下將會加場演出，包括台北、新加坡、北京、深圳等地。
頁:
[1]