發表者： 雙魚座 於 2005-12-08 09:08:34 (320 人閱讀過)

               【東方日報專訊】張學友因重感冒失聲，經過三日休息後，昨晚飛台灣續演《雪狼湖》，身穿樽領冷衫、圍頸巾，做足護喉十級戒備，加上太太羅美薇愛心湯水滋潤下，難怪短短幾日，學友已好番七、八成。

學友昨晚六時十五分抵達機場，精神明顯比前好轉，笑容滿臉，現場有三位保安維持秩序，有七、八名fans送機，其中有兩、三位fans都患上感冒，故戴上口罩出現，以免將流感傳給學友，呵護備至。問到身體狀況，學友一臉寬容說：「你聽我講都OK，好番七、八成，只係仲有少少咳，我冇睇醫生，keep住做運動、覺、飲水，陳太（陳淑芬）台灣準備藥物畀我。」太太羅美薇因為要湊女，不會陪他到台灣，他返港幾日太太和朋友輪流煲川貝、木瓜等湯水給他滋潤喉嚨。



暫停三場演出後，《雪狼湖》將於今晚在台北續演，學友會否擔心演出？他說：「每次上台都緊張，今次仲有壓力，所以提早一日去，唔想咁奔波。」當學友獲知延期演出只有十張退票，他十分開心。昨晚學友原定出席電影《如果．愛》首映，但為了養聲寧願缺席，他無奈的說：「費事啦，去首映有乜事就唔好，今次返香港係養聲，去唔到首映好遺憾，希望票房成功啦。」入閘時學友和fans揮手拜拜。