鄭秀文第8場演唱會 Sammi幫歌神學友宣傳新碟 安仔由頭睇到尾
StarHK星娛網 作者: 浩楠 / 2014-12-29 15:06:51

「Touch Mi鄭秀文世界巡迴演唱會」 昨晚（12月28日）紅館舉行第8場演出，周慧敏、鄧萃雯、伍詠薇和老公、盧凱彤和台灣歌手魏如萱、著名司儀李浩霖等。不過最觸目，可說是許志安，他不但由頭坐到尾，而且非常投入，與鄰坐Sammi的家姐一齊揮pong pong棒，又口噏噏跟住唱。

而台上Sammi狀態大勇，已完7場演出，昨日第8場開騷唱了多首快歌後，笑言：「仲有4場，完騷第一件事我要放塊豬肉乾入口，仲要食叉燒飯。歡迎你哋送豬肉乾、雞蛋仔、花生糖....其實我開心真係好簡單。」她又坦言開騷到昨日終於鼓起勇氣上網睇歌迷留言，結果大獲好評，令她心花怒放。

表演嘉賓天王張學友出場，全場震憾。Sammi撓住學友行完舞台上「紅地毡」後，笑對第一排觀眾說：「係咪9800蚊張飛都好抵睇呢？」又指學友逢騷必到，有求必應，封他「樂壇慈父」。

他們早於Sammi第一部電影＜飛虎精英之人間有情＞演情侶，Sammi笑說：「我同你拍第一集電影，不過好少人留意，如果大家翻睇請留意我當年碌大髀!」學友說：「好厲害，唔知點解你啲BabyFat真係好奇怪，Baby咗幾廿年，突然之間冇晒!」Sammi反擊：「咩突然間，我好盡力咁減架!」現場播出學友和Sammi在電影中咀嘴相片，全場嘩然!

Sammi和學友你一言我一語，非常搞笑，Sammi 大叫：「嘩，好open呀，我細個做乜咁Open嘅，拍埋呢啲三級片？（你睇你畀我揸住啲頭髮，幾激!）學友，我就送咗螢幕初吻畀你啦，好滋味啦，lum晒咀咁樣!（好正呀，同埋嗰陣時夠肉呢！） 咩意思呀？!」學友講得興奮幾乎踩到Sammi條裙腳，她笑說：「唔好踩到我條裙啦，著完要還架!」哄堂大笑。她又說：「你送咗隻碟畀我，仲簽埋名嘅，但我有啲氣忿難平喎，揸住隻碟時鼻哥窿出煙。（點解呢？）因為你明明有好啲版本嘛，你有靚聲版（你嗰張喺德國印，另一款係藍光版，要擺落電視機，我一套送晒畀你！）我買咗啦!（真定假？）我去CD舖，有一隻貴啲，我梗係買貴啲啦！（o依？我當咗綵排咁，唔記得有觀眾，喺度傾偈添!）得架。我要同大家講，學友專輯已經出咗啦，我聽咗，好聽到爆裂。（我唔係嚟做宣傳嘅!）我鍾意同你做宣傳呀!咁順便宣傳埋我嗰隻，買學友嗰隻燒內就搭我嗰隻豬頭骨，買埋我隻碟啦，多謝各位!」全場掌聲。

學友笑說：「Sammi同我講，你淨係拖我出去，企吓又行返嚟咁就走得。咁我打聽一吓，嘩，古天樂嚟都唱喎？!（係架，唔會走出我五指山架!）如果古天樂嚟唱，我嚟就唔唱咪好奇怪？所以我都要唱呀，咁我問佢想我唱咩歌…Sammi，你落台換衫啦，拜拜!」調走她，學友爆料說：「我先此聲明，我唔係嚟plug歌，因為我做嘉賓好少唱新歌。但佢話真係好想我唱呢首新歌，咁我返去睇吓歌詞就知道點解要我唱呢首歌喎!首歌係講一啲男女經歷咗啲波折，學懂點樣去愛…」觀眾歡呼，有人大叫「安仔」，他續說：「所以我知道呢首歌點解感動到Sammi!」然後他獻唱＜用餘生去愛＞。

除了Sammi買碟捧場，演唱會另一表演單位C AllStar，四小子在後台見到偶像學友火速集郵，之後還表示已買了其新專輯，非常好聽!