北京紅毯玩自拍
學友拍《赤道》好彩唔使打
蘋果日報 建立時間: 0423 21:03

高大嘅崔始源拎住自拍神器同拍檔玩自拍。

第五屆北京國際電影節今日喺北京懷柔舉行閉幕頒獎禮，《赤道》成為電影節嘅閉幕電影，眾《赤》片演員張學友、張家輝、余文樂、張震、文詠珊（Janice Man）、韓星崔始源、池珍熙同兩位導演梁樂民、陸劍青盛裝到場，咁多位更童心未泯先後喺紅地毯同後台大玩自拍。

JM著住開胸露腿晚裝，喺紅地毯上非常搶鏡，佢哋平排行喺紅毯上，高大嘅崔始源拎住自拍神器同拍檔玩自拍，大家都各自擺出心水甫士搶鏡。其間余文樂遇到頒獎嘉賓之一嘅陳奕迅（Eason）即傾唔停，余文樂仲講笑問Eason唔會加入拍《赤》片續集。

張學友今日先歸隧，錯過咗《赤》噚晚喺北京嘅首映，佢喺後台表示喺戲入面中唔使打，但見到其他演員有唔少動作鏡頭，都覺得佢哋辛苦，學友話：「其實覺得崔始源同余文樂好勁，因為佢哋嘅眼神簡直殺死人，佢哋唔使用槍都一樣殺死人。」講到興起佢哋喺後台又再selfie一番。

另外，大會請嚟楊千嬅、林嘉欣等擔任頒獎嘉賓，千嬅會同小齊合頒獎項最佳音樂獎，林嘉欣就同噚日日60歲生日嘅導演杜琪峯同陸川頒發「最佳攝影獎」。法國導演洛比桑（Luc Besson）、陳慧琳同呂良偉等都有出席頒獎禮。