【一票難求】學友12月開廿場紅館騷 預加場唱到跨年
蘋果日報 建立時間 (HKT): 0913 13:00

4年冇開騷嘅歌神張學友強勢回歸，將於12月4-29日假紅館舉行20場「A Classic Tour」巡唱，門票於今日信用卡優先訂先，最貴飛$980，最平都要$380，果然係天王價！

歌迷為咗撲飛今早搶訂，但好多歌迷都話買唔到，一票難求，仲難過搶機票！

網民紛紛怨爆留言：「打咗398次電話都唔通，終於上網買到，簡直難過搶機票」、「試過7次，都係響咗兩下就CUT我線，有無搞錯不好」、「入唔到又打唔通」、「打咗1.5小時，固網電話同手機加埋上網不停F5，電話通咗6次，但全被CUT線，網就唔洗講，入都入唔到，要放棄了，如果因為買飛而冇咗份工唔值」、「等公開發售」。

據知，內部訂飛已經爆晒，最初暫定開15場，未公開發售已內部加5場，o依家場數係20場，不過，消息指由於歌迷餓咗好耐，太多人搶飛關係，學友騷將再加場唱到跨年；今次學友每唱三場休息一日，相信佢係希望保持以最佳狀態演出，盡力做到歌迷滿意。