jacky 發表於 2018-5-3 10:01

《陀地驅魔人》「兩兄弟」再拍住上? 張家輝:佢邊得閒

【學友讚有進步】《陀地驅魔人》「兩兄弟」再拍住上? 張家輝:佢邊得閒
蘋果日報 0503 00:00



由張家輝自導自演嘅新片《低壓槽》噚晚喺九展舉行群星首映,同場仲有張可頤、苗僑偉(三哥)、陳慧琳等捧場,而與家輝為異父異母關係嘅「大佬」張學友特別現身支持。

現正忙於世界巡迴演唱會嘅學友話,自己今日(3號)就離港去江西繼續做騷。提到日前學友班老友梁朝偉、劉嘉玲及曾志偉等拉隊去台北捧場(新聞連結: https://bit.ly/2I7GXBP ),學友話:「係呀,我book咗間VIP房俾佢哋,諗住好秘密啦,點知佢哋自己登晒出嚟。」

家輝話,其實冇諗過學友呢晚會現身首映,因為佢知道對方忙緊做巡迴,所以連聯絡都少咗:「佢起勢咁巡迴,知佢成日都要飛來飛去,不過呢兩日通過電話,咁啱佢喺香港,所以就叫佢嚟。」

再問學友之前有冇睇過《低壓槽》嘅預告片,學友話:「之前已經睇咗喇,覺得家輝有進步,喺鏡頭運用、意識形態都有自己嘅風格,比起小弟有份參演嗰套《陀地驅魔人》成熟咗好多,打鬥場面都幾特別。」家輝聞言即謙稱:「我都仲有好大嘅進步空間嘅,好多謝投資方俾我一次咁任性嘅投資,多謝台前幕後對我嘅信任,日後如有啲咩新嘗試或者新題材呢,都會嘗試繼續去做導演,不到呢一刻自己都未諗到。」咁「兩兄弟」有冇合作機會?家輝即答:「佢邊得閒吖?巡迴巡到好似行咇咁,要巡幾年。」

記者提到家輝諗得嚟,可能學友個巡迴都完咗,學友亦即「交期」:「係啦,我都係巡到明年1月之嘛,你都唔會咁快開㗎啦?」家輝就話:「我好安守本份嘅,我好清楚知道自己係一個演員嘅身份,如果有好嘅劇本,我都會做導演。」學友笑言家輝以導演身份講嘢,成個人唔同晒:「以前好似我咁,講嘢冇乜point嘅,o依家有自己嘅風格囉,好正經,搞到我都有啲驚呀,想叫番你做大佬。」家輝亦笑住接口:「唔使驚喎細佬!」

咁家輝又有冇諗過搵老婆關詠荷合作呢?家輝坦言:「呢個機會就比較微啲喇,因為屋企都要有人睇住,所以我會自私啲唔俾佢拍。」




異父異母嘅「兄弟」張學友特別到場支持
頁: [1]
查看完整版本: 《陀地驅魔人》「兩兄弟」再拍住上? 張家輝:佢邊得閒