發表者： 雙魚座 於 2004-04-19 09:37:42 (259 人閱讀過)

            好友離世驚覺生命無常 張學友預立遺囑保障妻女
18/04/2004

去年好友張國榮、柯受良及梅艷芳逐一離世，令張學友驚覺生命無常，並決定打破禁忌，趕緊為自己的過億身家訂立遺囑，以保障妻女家人的生活。

口述：張學友　筆錄：陳冬嵐、黃雅詩 攝影：莫瑛

上年我好朋友一個個離開對我有乜啟示？其實對唔識佢人都會有影響，何況我係認識佢人。最起碼畀我知道時間原來唔係無盡同埋唔係你預計到。好似一般人二、三十歲，都會諗自己有六、七十歲命，會覺得仲有四、五十年去計畫未來。但經歷過上年，發覺原來事實唔係咁，呢事可以係聽日、後日、一年之後，又或者真係四、五十年之後先發生都有可能。



買重保險

既然係咁，我依家會覺得邊係迫切性就做先，唔好再拖！譬如立遺囑。雖然我未正式寫，但最近諗得好積極，究竟份遺囑係點？我以前其實係一個好忌諱人，就算有諗都唔會實踐，覺得仲有大把時間，到我五十歲先立遺囑都未遲，可能人覺得咁做太早添！但依家就唔同，反而覺得遲，因為遲會好危險，搞得唔清楚，亂晒大龍，到時點呢！所以呢都係要小心、清楚處理好。同埋依家亦明白忌諱係冇用，因為呢係唔想提，唔代表唔會發生，所以要做好準備保障屋企人。有冇進一步加大保險額？我不嬲都買保險，為朋友又好，為家人又好，但我唔會加碼，因為已經做到好足，再加唔得啦！我覺得夠已經得，唔會特別咁諗。

拒絕誘惑

另外，寫書畀個女都係迫切要做，Touch Wood（大吉利是）講句，即使我聽日唔度，佢都知道我前面得到乜，定唔，等佢自己去分析，然後成長去累積佢。

至於話我係緋聞絕緣體，如果咁多年都話完全冇誘惑就呃你，一、兩單都有，試過有人凌晨一、兩點敲我房門，問可唔可以入飲杯，咁算唔算係呢？件事冇發生過，永遠都唔知係唔係誘惑。最後我話：「唔好喇！夜喇，我要喇！」可能人只係好鬼悶，想坐低傾偈呢！但我性格好怕死，乜都驚，有好多未必承擔得起！每樣一諗到後果，有好多事都唔會做，尤其我係做呢行，就更加小心好多。

學友表示自從好友相繼離世後，令他的價值觀有所改變，更積極手保障家人的生活。