發表者： 雙魚座 於 2004-04-21 10:13:12 (250 人閱讀過)

            為人被動 知己難求
學友煩事鎖心底自閉不求人

21/04/2004 太陽報

自認自閉的張學友從不敢開口求人，全因阿媽落「要靠自己」。學友性格被動，甚少與人傾心事，令他失去不少圈中朋友。

口述：張學友 筆錄：陳冬嵐、黃雅詩



我係個自閉人，唔識主動搵人，亦好少求人，我好怕開口。我試過開口，但係心理掙扎好大，甚至只係請演唱會嘉賓都唔敢開口，其實簡單到不得了。我由細到大，對邊個都係咁！可能係我怕欠人，其實我一開口就冇問題，次次都成功，但總係唔想欠人。

我非常之唔主動，例如拍緊一部戲，會同拍檔好好朋友、好熟，但係拍完過一段時間，就好似冇個朋友，譬如Maggie（張曼玉）咁，而偉仔（梁朝偉）都間唔中有電話聯絡，家輝（梁家輝）好，我曾經買過兩袋橙上佢屋企，話好耐冇見佢，好鬼老土！我就係咁，朋友約你，你唔出去一兩次，人就以為你唔鍾意同佢玩，咁就算啦！係性格造成，自己！
搵出路自救


我好少同人講心事，以前飲酒就多，喊笑，但係一清醒就唔會傾。相信係受阿媽影響，細細個阿媽已經灌輸一個訊息，就係唔好求人、唔好借錢，要靠自己，所以我習慣自己解決問題。如果我有問題解決唔到，會放埋一邊唔理，可以話盡量解決，連老婆阿媽都唔會講，我唔想丟個包袱畀人，朋友都好少會講，所以朋友成日以為我好冇問題，以為只係擔心老婆仔女，其實有大把問題，邊有人會冇問題？至於會唔會鬱埋唔開心？我冇鬱埋，只係放低！所以唔會出現抑鬱情況，我算係求生力強人，總會搵到出路。

結婚後社交圈子會唔會細？其實應該話轉，圈中新人、新導演好多我都冇見過，係少圈中朋友，但係反而交友範圍大，例如：識多家長、校長，中西人都有，此消彼長！