發表者： chiasan 於 2010-02-23 11:57:05 (242 人閱讀過)

            2010年02月22日 香港蘋果日報

電影《 72家租客》前晚於尖沙嘴舉行新春團拜，出席的演員包括有曾志偉、張學友、袁詠儀、黃宗澤及 Ba叔人。身為導演兼監製的曾志偉表示票房理想是最好的新年禮物；靚靚則表示最初以為《 72家》與《花田囍事 2010》會叮噹馬頭，暗指《 72家》贏成條街。

曾志偉、張學友、袁詠儀等人前晚到尖沙嘴出席電影《 72家租客》新春團拜，身為導演及監製的志偉於台上致謝時表示今年是最開心的一個新年，他說：「我冇拍戲做導演十幾年，年年都喺外地過，今年最想返香港，每日開電腦都睇到話爆滿，觀眾眼睛係雪亮嘅，同埋咁多部戲嘅廣告，我哋做得最唔核突。」

打贏西片最自豪
事後問到志偉是否暗寸《花田囍事 2010》？他解釋：「唔係寸人呀，我希望兩部港產片可以打贏西片。」早前志偉曾指去年的《花田囍事》是爛片，前晚他說：「我有睇呀， OK呀！比上年好睇好多，不過我哋就笑中有情，佢哋就係古裝片。」

根據戲院商會資料，兩套電影在港票房截至前日為止，《 72家》收 2161萬元，《花田》則收 1302萬元；即使廣州《 72家》同樣贏《花田》，兩片上映七日，《 72家》收 765萬人仔，《花田》收 674萬，難怪志偉牙擦擦。

袁詠儀（靚靚）亦希望港產片回復當年的盛世，她說：「今次真係承志偉貴言，佢話第一就第一，黃百鳴都高踞咗咁多年，讓一年唔緊要啦，我初時都以為兩套戲會叮噹馬頭。」
採訪：藍文浩、王崇穎
攝影：陳順禎

對於《 72家租客》票房理想，志偉於台上報喜並多謝一眾演員。

洪天明及森美一臉期待收到張學友的利是。