張學友禁仔埋大女身堅持送女返學
2016年05月27日 頭條日報

學友相隔4年再開騷

張學友除了是「歌神」亦是「二十四孝」全能好老竇，買餸、湊女一腳踼。本周一，已宣佈將開巡迴Show的學友晨早起身，親自揸車由港島淺水灣寓所接載15歲長女張瑤華，到位於屯門的英國貴族哈羅國際學校。頭戴白色Cap帽，一身便服的學友由天王變司機，安全送抵囡囡返學校後即趕去為巡唱開會。因為大女生得索，又知道好多男同學埋身，所以就算幾忙，學友都要親力親為送女返學，天王老竇認真唔易做。

天王變身司機親送愛女返學

相隔4年，學友宣布再度挑戰自己舉行《2016 A CLASSIC TOUR》，頭炮於今年10月21至23日在北京展開，香港站定於聖誕檔期在紅館上演，暫定開10場，橫跨聖誕及新年，不過，學友其實已Book了場館近兩星期，因為內部認購爆到七彩，加場是必須的。據知情者說：「原先學友無諗住咁快又開演唱會，反而較有興趣做一個全新音樂劇，但今次環球唱片(合作單位)竟然按通漲加一倍天價歌酬利誘學友重踏台板，走埠價每場高達$230萬，香港歌酬都有$150萬，兼且為入行30周年作總結，意義重大。學友又係賣座保證，有價有市，粉絲餓足4年應該長做長有。」

學友為今次巡演好緊張，不論演出同製作都會加入意見，所以頻頻開會研討。不管點忙於好，學友好鍚兩個寶貝女，返學放學、行街食飯風雨不改管接管送，甚少假手於司機。上周去完北京舉行巡演發佈會的學友，本周一早上6時多便起牀，7時便駕駛黑色Range Rover送寶貝千金瑤華返學，穿校服的的瑤華坐後座，從側面睇，瑤華五官精緻，輪廓似足媽咪羅美薇。學友放低「大公主」後快閃去工作，為頭家忙到甩轆。據知，因為當日正值期考，學生可以選擇不用在校內留宿，所以幾粒鐘後交由司機接送瑤華返回住所。

※身穿校服的張瑤華(左一)上年成功入圍寫作比賽，並與其他參賽者合照。