【環球倒戈撐ViuTV】譚校長出山做主持 劉華學友做嘉賓聯手打無綫
蘋果日報 時間 (HKT): 1009 23:36

校長將會為ViuTV主持節目。

ViuTV開台半年，雖然首季蝕咗6800萬，亦暫時未見佢哋能夠對無綫收視造成衝擊，但係佢哋未因為蝕錢而閂水喉，繼續試新嘢。

ViuTV開台至今主打實況娛樂同真人騷嘅，聽聞出年會改變方針，會繼續做新一輯《跟住矛盾去旅行》同《G-1格鬥會》等節目之外，會開始主力做音樂節目，搵咗唔少猛人助陣！《蘋果》收到可靠消息，譚詠麟(阿倫)嚟緊會主持《譚校長談欣賞》，呢個節目暫定有10集，每集阿倫都會邀請有份量嘅歌手擔任嘉賓，據知已經落實包括張學友、劉德華、五月天同孫楠等等。阿倫一向風趣搞鬼，佢主持節目應該會有一定吸引力，但就未知到時佢哋除咗傾偈之外，會唔會一齊jam吓歌。

除咗阿倫主持新節目之外，ViuTV會開拍一個落區唱歌嘅音樂節目，由Dear Jane、RubberBand、Robynn & Kendy同C AllStar呢四隊樂隊組合，每次會聯同許志安以及唔同歌手落區開騷。

ViuTV星期二會喺灣仔演藝學院舉行「2017年節目發佈會」，到時阿倫、許志安、劉美君、Dear Jane、C AllStar、RubberBand、衛蘭、Gin Lee(李幸倪)等出席。睇番今次有好多環球歌手力撐ViuTV，無非因為早幾個月前，無綫因為要環球唱片公司簽一世任用網上播放權，亦即係要環球旗下嘅歌曲，永久俾無綫喺網絡平台使用，環球覺得好唔公平，於是再同無綫反面，亦因為呢個原因，加強咗環球同ViuTV合作。

對於搵阿倫主持節目同加強音樂節目製作，ViuTV公關部王小姐噚日回應話：「有關未來新節目內容會喺星期二嘅發佈會先公佈。」RubberBand成員泥鯭就話暫時未收到消息，佢話：「冇落實拍嘢住……落區玩音樂梗喺有興趣啦，係就快啲啊……但係12月前RubberBand都會比較忙，因為要籌備音樂會，就到時間係可以嘅。」