張學友幫囡囡澄清緋聞：佢哋唔係好熟
東網電視 06月26日(一) 12:39

「歌神」張學友的16歲大女張瑤華（Zoe）疑似情竇初開，被爆與一名外籍靚仔Mathis傳出拍拖，兩人不單在網上公開攬攬照，兩人更隔空傳情，互相留言「Love」對方！但最震驚的是Mathis在社交網自爆已婚，「老婆」卻不是Zoe，認真離奇，不過Mathis事後對東網表示自己目前是單身，與Zoe是朋友關係。

昨晚學友完成山西的巡迴演唱會，今日由太原返抵香港，在機場首度開腔回應愛女Zoe的戀情，直認已經睇過囡囡嘅網上圖片，又指自己已與囡囡「交涉」，言談間表現輕鬆，明顯唔擔心囡囡交友取向：「多謝大家嘅關心先，我當然有了解啦。或者呢個階段，大家都知個男仔係另一間學校嘅學生，喺社交媒體話佢結婚都係個遊戲嚟啫，大家都可以想像到，17、18歲，又準備升學。佢同阿女係朋友嚟，不過唔係好熟。大家見到行山幅相，其實係第二個人嚟，唔係同一個人嚟，嗰個係學校另一個同學，只係行山撞到，張相亦都係好耐，我都見過，好耐以前。」

學友輕鬆講囡囡嘅緋聞，睇得出佢都好了解年輕人嘅交友方式。

問到囡囡另外有張相係同個男仔攬攬喎，表現親密，學友即時幫手澄清係年輕人文化：「嗰個男仔喺學生界都好出名，佢有做模特兒、又設計服裝，喺佢哋個圈子成日都係咁樣嘅。（攬相見過？）之前冇睇，今次你哋講咗咪睇吓囉，我睇咗個張相『I love u』，據我了解，我同阿女成日都會咁講，其實喺佢哋文化上面通常係咁，講love u 等於講bye bye，對我嚟講冇咩特別，我都有問過個女，我哋成日傾偈，佢只係覺唔好意思影響到其他朋友。我覺得首先件事冇證實，不過我諗大家都係出於關心啫。不過我覺得小朋友，尤其我哋啲下一代，仲有好多下一代，十幾年後可能會遇到同一樣問題我諗。」

仲傾到笑晒㖭。

不過重點都係澄清咗阿女唔係同個外籍男仔拍拖。

又表示依家嘅年輕人講love u 等於講bye bye咁普通。