巡演勁賺2億　張學友下年再登紅館
東網 04月03日(二) 00:00        

張學友已經揀定紅館作為今次巡唱嘅終點站喇！

歌神張學友《A Classic Tour學友‧經典世界巡迴演唱會》由2016年10月在北京揭開序幕，目前仍進行得如火如荼，前晚學友在浙江紹興巿舉行第147場巡唱，剛剛刷新了他自己保持的紀錄，並再次創下華人歌手的新紀錄，勢會朝住200場衝刺，學友的巡演暫時排到六月底瀋陽站，大概會去到一百六十幾場，以學友神級的身價，保守估計100萬一場，盛傳今次巡演為他帶來2億落袋。

保持初心

前晚學友在紹興站演出，面對3萬滿座的樂迷朋友分享心情：「今天是非常特別的一天，開場前一直叫自己不要緊張，但一想到今天是破紀錄的一天就很緊張....」在這個破紀錄的夜晚，剛好也是好友張國榮離世15周年紀念，學友也於演唱會現場悼念這位摯友，特別獻唱哥哥的經典作《風繼續吹》，他感性說：「希望大家能記住張國榮。」

再創下華人新紀碌，學友始終保持初心說：「並非為咗打破紀錄而唱。」今早學友由紹興返港，有十數個歌迷專程去接機，談到再一次打破自己保持的紀錄，學友竟有點怕醜笑說：「係，唔經唔覺。（好短時間就破！）都OK，都冇乜特別諗，覺得過得好快啫，做緊嘢就會過得快。（體力OK？）依家舒服過開頭做，因為始終做熟咗。（冇人破到你紀錄？）哈哈，紀錄呢啲嘢，係用嚟講㗎啫。」他深信將來一定有人能破他的紀錄，他笑說：「實有嘅...應該，係冇問題，因為巿場同以前唔同咗，依家同上次都差好遠，去番同一個地方，你會覺得成個地方唔同咗，好似經濟呀，依家大陸個發展係好咗同快咗好多。」

贊成推實名制

東網收到消息指學友明年1月將再登紅館，學友選定紅館為今次巡唱的終點站，學友說：「應該係，申請咗，我唔知攞到未，我都想喺香港完。（香港後唔會再加？）冇得一路做落去㗎，始終都要完㗎！（一路唱囉？）可以繼續唱，咪唱第二啲嘢嘛，唔通唱一樣嘢唱咁耐！」每次學友的演唱會總是掀起搶飛熱，甚至被炒賣過成萬一張，對有人建議採取實名制賣飛，他極力贊成，他說：「我覺得實名制冇乜壞，好呀！因為我哋有陣時見到自己啲飛炒賣到好貴、好貴，都覺得唔舒服，所以我贊成實名制。」

此新聞相關影片 : http://www.jackyclub.com/thread-17116-1-1.html

張學友前晚完成第147場巡唱，今早返港。


張學友一講到再次打破自己嘅紀錄時就有啲點怕醜呀！


另外，張學友對有人建議採取實名制賣飛，他亦表示極力贊成。


張學友又指有陣時見到自己啲演唱會飛炒到咁貴都會覺得唔舒服。


張學友再次創下華人歌手巡唱的新紀錄。