天王經典！學友城城做幼稚園學生唱兒歌
東網 04月06日(五) 22:12        

近年香港嘅兒歌買少見少，但原來想當年兒歌都有舉足輕重嘅地位，就連天王巨星都會出席《兒歌金曲頒獎典禮》！呢日big big channel就搵番1992年頒獎禮嘅片段，天王郭富城、歌神張學友以及草蜢齊齊化身幼稚園學生，大唱經典兒歌！

一開始，校長鄭丹瑞不滿音樂老師倫永亮嘅教學模式，一於隨機抽啲學生出嚟表演，睇吓佢哋有冇做歌手嘅天分。話口未完，郭富城即刻畀人推出嚟，即席用小朋友唱腔跳唱首本名曲《對你愛不完》，仲跳到失晒控添！之後輪到草蜢出場，佢哋大唱經典兒歌《打開蚊帳》，將歌詞由「有隻蚊」改做「有隻蜢」，乘機hard sell自己，期間張學友仲走出嚟拉開蔡一傑嘅褲腳，笑對方冇腳毛，搞到場面勁混亂！

最後張學友壓軸登場，佢用超可愛嘅小朋友聲嚟唱英文兒歌《My Bonnie》，仲投入到帶動所有歌手一齊唱！唔少網民都大讚佢哋超搞笑，亦有網友表示好懷念以前嘅兒歌，仲大數佢哋心目中最經典嘅兒歌金曲。

手機觀看請點: https://youtu.be/rOU0LYTIfEU