【想發達千祈咪入行】深信「覺得自己唔夠好」成動力 學友：繼續做落去
蘋果日報  2018年06月22日

攝影：沈健程
        
張學友今日以榮譽院士身份，為演藝學院「第三十二屆畢業典禮」擔任主禮嘉賓，修讀戲劇藝術碩士嘅鄭麗莎亦係今屆畢業生。

學友着住院士袍現身，觀看完畢業典禮後就喺台上致辭，分享加入演藝圈嘅苦與樂，學友相當風趣，佢話：「恭喜晒畢業嘅同學，見到你哋咁興奮，演藝界將來好有希望，希望未來見到同學喺唔同界別大放異彩，我本來記晒啲台詞，拍完200幾次手，一叫我個名就唔記得晒，O依家照住讀。」

學友分享咗入行34年嘅一啲經驗：「我喺行內算係運氣好嘅人，我亦幸運地喺呢個行業工作咗接近34年，我打算繼續做落去！」學友仲搞笑話：「如果你希望入演藝圈可以發大財，賺好多錢嘅話，我建議你趁仲未入行馬上考慮投身其他行業，做地產、買股票，大家有冇留意最新公佈嘅福布斯富豪榜，頭一、二、三百位，都搵唔到一個、喺世界上、行內大家熟悉嘅名。」佢仲笑話想「紅」嘅話可以喺巴士上同阿叔鬧場交，又或者拍條青春無敵嬉水片段放上網。

貴為歌神嘅學友，始終覺得自己係個「唔夠好」嘅藝人，佢話：「我深信『覺得自己唔夠好』嘅態度，就係我可以喺呢個行業生存嘅主要原因，當你覺得自己已夠好或是最好，就冇要求自己再好嘅動力同空間。」最後，學友話喺呢行工作只係為咗一個字，就係愛。

此新聞影片：http://www.jackyclub.com/thread-17206-1-1.html

學友出席演藝學院嘅畢業禮。

學友喺台上分享入行經歷。