【到大馬搶飛】為睇張學友個唱 巿民提早一星期排隊撲飛
蘋果日報 時間 (HKT): 0901 22:29        

以前睇演唱會，係慳零用儲埋儲埋嚟買飛；家陣睇演唱會，錢同時間都唔係最重要，係要如何（安全地）成功得到張飛至為最大學問。

學友下月到大馬再開騷，掀起搶飛熱。（資料圖片）

好似上月25日於柴灣售票處發生斬人事件，於是原定本月4日公開發售嘅劉德華假紅館舉行嘅跨年演唱會門票，最後決定取消於售票處售票（新聞連結： https://bit.ly/2Lz0F7h ）；另一方面，華仔又拍片宣傳，呼籲觀眾唔好買黃牛飛（新聞連結： https://bit.ly/2LNUEUi ）。

以為只有香港先咁瘋狂？梗係唔會啦…

據大馬傳媒報道，香港「歌神」張學友將於下月5至7日舉行3場「A CLASSIC TOUR」演唱會，並將於明日（9月2日）於當地嘅桂和購物廣場（Quill City Mall KL）舉行首賣會，而首賣會將公開俾800位購票者預告購票，每人最多買4張，網上購票則喺當地時間下周二（9月4日）早上11時起公開發售，同樣每人都只可以買4張飛。

雖然尚未公開售票，但有唔少民眾已經早喺大前日（8月29日）已經開始排隊，為撲飛而要瞓足幾晚街，人龍已經延伸到商場嘅2樓。雖然主辦機構因為安全問題，唔鼓勵歌迷瞓街撲飛﹐不過現時情況已經係咁，佢哋都有派發水同麵包，亦加強保安以保障排隊者嘅安全。而主辦機構亦有喺其官方facebook度貼文，公開當日賣飛詳程，並指會派籌等以識別排隊人士嘅次序等。

呢個安排仍然惹嚟唔少網民有微言，指排隊的人都係做代購，然後轉售門票賺錢，另有人建議要登記，好像買機票一樣，亦有人留言建議「可否效法某天王？」，睇嚟佢暗示嗰個係劉德華。不過，有人暗嘲呢班排隊係「媒」，只係幫主辦單位造勢。

主辦單位喺官方fb公佈售票詳情（互聯網圖片）