【不斷更新】學友紅絲絨長褸熱舞 囡囡瑤華捧場
蘋果日報2019年01月11日

歌神張學友今晚喺紅館舉行15場「學友．經典」香港站演唱會，喺8點15分開場，演唱會開四面台，每個入場嘅觀眾都會送一支燈棒。

另外，巡迴演唱會以香港站作尾站，頭場更見到學友囡囡瑤華現身捧場。

2140：學友唱出《和好不如初》，瑤華睇到興奮舉手搖，之後就到《寂寞的男人》、《遙遠的她》。唱到《野貓之戀》時女Dancers換上性感短裙，之後喺煙火效果下唱《餓狼傳說》。喺唱出《如果這都不算愛》就同觀眾再次握手，之後再唱《我醒著做夢》。

2136：學友換上全套藍西裝唱《頭髮亂了》。

2119：學友又向歌迷介紹台上結他手，佢話好開心見到香港朋友：「知道大家做完嘢會好攰，大家可以揀瞓下覺，不過唔瞓嘅話，就盡量放開自己。」學友又話香港騷開始，亦表示巡迴即將完結，令佢好緊張，又感冒又抽筋，仲講笑老人病出晒嚟。佢又作自己我介紹，入行唱咗30幾年歌，已經開咗800幾場演唱會。之後佢又清唱半首《月半彎》、《她來聽我的演唱會》、《我真的受傷了》。

2037：學友唱出《離人》嘅時候，仲坐住款嘅道具船，之後就唱出《這麼近（那麼遠）》，唱嘅時候不時仲有蘭花手出現。之後仲唱咗《怎麼捨得你》、《愛火花》、《忘記他》。

2025：學友唱出第二首歌《非常夏日》，第三首就係《今晚要盡情》，仲行咗埋觀眾度唱，不過就冇握手，學友全程都冇正式打招呼講嘢，只係間中講thank you。

2015：張學友着住金色燕尾裝出場，仲戴住一頂高帽，見學友留鬚根，精神奕奕。一出場全場嘅觀眾歡呼，而學友就唱《我與你》。