鬧新人唱歌難聽　學友罕有寸爆秋生
東網 01月12日(一) 15:16

張學友笑言自己入行30年，依家先知少少點唱歌，連歌神都咁謙？

【on.cc東網專訊】 張學友為新國語專輯到電台訪問。由於之前學友承認與製作人陳淑芬意見分歧，入行30周年紀念演唱會告吹。由於紅館檔期要一年前入紙book，所以學友說：「今年話我開演唱會嘅消息一定係假。」有指他原定紅館4、5月檔期會由其他歌手頂替，他說：「應該嘅，有人接就好！」由於今年演唱會做不成，豈不是賺少幾千萬？他笑說：「冇乜收入，今年蝕架啦！（你唔使跑數？）唔使，做吓其他嘢，拍吓廣告，不過好鬼衰，做演唱會時先有廣告，唔做就冇乜廣告！（你收得貴！）物有所值嘅！」

學友透露會將經理人工作交畀環球處理，但可能好多人未慣，這陣子好多人搵他，他笑言：「都煩架。（係咪唔好意思傾價錢？）呢啲唔應該藝人傾，除非自己公司啫，自己傾好古怪，我叫佢哋搵環球傾。」他笑言自己是老闆之一，跟環球合作多年，大家有一定默契，環球各地區老闆都認識，所以沒有所謂！

無意搞30周年慶祝活動

提到今年是張學友入行30周年，他笑言阿倫（譚詠麟）的入行40周年頂住晒，他笑說：「我差好遠，都唔好意思講。」問到環球可有送他金牌？他笑說：「員工就有，我哋呢啲冇，公司有乜喜慶仲問番我哋畀幾多，呢個形式嘅嘢，我哋呢個年紀唔追求。」學友表示其實他真的沒有想過相關30周年慶祝活動，問到不覺得有意義嗎？他笑說：「點解31年唔可以咩？加上阿倫已經做咗40周年，你自己喺度嗌30年幾肉酸呢，得30年嘈喧巴閉，懶勁咁樣。」提到曾志偉叫阿倫退休，學友笑說：「咁佢冇阻住嘅，各行各路，大家有自己條路行緊。」

入行30年依家先知點唱歌

問到入行30年感覺如何？學友笑言：「唱咗30年，依家先知少少點樣唱歌，（你咁謙！）唔關事，有啲人有天分好啲，我哋冇架，係靠後天努力，（黃秋生之前彈樂壇新人唱歌唔掂！）但佢都係樂壇新人，樂壇新人彈番樂壇新人嘅，咁奇怪。」他表示間中聽電台都留意到有些新人的歌幾好聽，好似馮允謙唱R&B幾好，許廷鏗唱歌都幾「實淨」，他笑說：「再講C AllStar都冇意思，佢哋已經變咗舊人，其實有啲樂隊幾好，依家樂壇整體係平均啲，以前樂壇男歌手比較主導，依家係平均啲，（但冇乜天后？）好多原因，時機啱唔啱，以前有咁多天王天后都係煲出嚟，慢慢煲，但依家都唔揼火點煲。」

觀看影片請點：http://www.jackyclub.com/thread-15989-1-1.html